Լճաշեն և Զովաբեր գյուղերում կկառուցվեն ոռոգման համակարգեր

Ինչպես տեղեկացրին Սևանի համայնքապետարանի աշխատակազմից, Զովաբեր գյուղում իրականացվելու է ոռոգման ցանցի կառուցում՝ 4615 գծամետր երկարությամբ, որը միանալու է նոր կառուցվող խորքային հորին: Նախատեսված են նաև ջրամբարի և պոմպակայանի կառուցման աշխատանքներ:
Ջրամբարի և պոմպակայանի տարածքների համար կառուցվելու է ցանցավոր ցանկապատ: Ծրագրի  նախագծային արժեքը 167 միլիոն 840 հազար դրամ է, որի 75 տոկոսը հատկացնում է ՀՀ կառավարությունը, 25 տոկոսը՝ Սևանի համայնքապետարանը։

Լճաշեն բնակավայրում կառուցվելու է 12 հազար 813 գծամետր  ոռոգման ցանց, որը միանալու է երկու նոր կառուցվող ջրամբարներին: Շինաշխատանքների ընթացքում նախատեսված է նաև երկու պոմպակայանի կառուցում:
Հիշյալ տարածքը առանձնացվելու է ցանցավոր ցանկապատով: Ծրագրի նախագծային արժեքը 216 միլիոն 242 հազար 650  դրամ է, որի 75 տոկյոսը հատկացնում է ՀՀ կառավարությունը,  25 տոկոսը՝ Սևանի համայնքապետարանը։ «Առաջիկա օրերին Վարսեր բնակավայրում ևս կմեկնարկեն ոռոգման ցանցի համակարգի կառուցման աշխատանքները:
Ծրագրի իրականացման կապալառուն «ԱՍ-777» ՍՊԸ-ն է: Բնակավայրերում գյուղատնտեսական նշանակության հողերի օգտագործումը նպատակային դարձնելու, գյուղատնտեսությունը զարգացնելու, բնակիչների կյանքի որակը և սոցիալ տնտեսական վիճակը բարելավելու նպատակով իրականացվող ծրագիրը հնարավորություն է ընձեռելու լուծել սոցիալ-տնտեսական մի շարք խնդիրներ, ունենալ աշխատանքին համարժեք արդյունք»,-ներկայացրին Սևանի համայնքապետարանի աշխատակազմից:

Խոսրով  Խլղաթյան